Во својот став за средбата Трамп – Путин на Аљаска новинарот и водител Богдан Илиевски алијас Бетмен Велит апелира до Македонците да не се воодушевуваат затоа што тој смета дека на истиот начин и нему му се кроела и крои судбината!
Целиот апел на Илиевски:
Следете, анализирајте, учете, извлекувајте заклучоци. Ама не се воодушевувајте ни на Путинчо, ни на Трамп братот, ни на бедотијата на Европа, ни на докажувањето на лековерноста на зеленашите во Украина. Нема ништо воодушевувачко во ова што се случува.
Нема ништо воодушевувачко во средбата на Трамп и Путин во Аљаска. Како што немало ништо воодушевувачко во Јалта. Неколку главатари на салфетка ќе нацртаат милиони судбини и децении со проблеми за сите други, освен за ними, џанам ќе се помали проблеми од оние кои сега постојат, па со самото тоа ќе бидат решение, а не проблеми.
Нема ништо воодушевувачко во навивањето за Путин, кој работи за интересот на Русија, по цена на крв. Нема ништо воодушевувачки ни во навивањето за Трамп, кој работи за интересот на Америка, по цена на економијата. Нема ништо воодушевувачки во мизеријата на Европа која соучествуваше во доаѓањето до оваа ситуација, а сега е важна како пешачки во Чаир, ниту пак има нешто воодушевувачки во следењето на мизерноста и малкоста на Зеленски кој седи на страна од масата и чека да види каква коска ќе фрлат оние на масата, откако ќе вечераат.
Нема ништо воодушевувачки во тоа во живо да гледаме како во риалити шоу како се „решава“ кашата која ја зготвиле воените профитери. Бидејќи решението нема да е добро за народот кој бил фрлен во челуста на тие профитери.
Нема ништо воодушевувачки, освен идејата дека може да има мир. И некое дете да го гушне повторно својот татко вратен од фронтот, наместо да го испрати во лимен ковчег во земјата која тргнал да ја брани.
Нема ништо воодушевувачки народ кој бил делен и пределуван, кој го памти Букурешт, да ликува над туѓите судбини затоа што мизеријата божем е полесна, кога гледаме како ја доживуваат и други.
Воодушевувањето е секогаш со храброста. Никогаш со блесавоста.
Тажно ми е сè што гледам, а сепак… се надевам на мир.
Нема ништо воодушевувачки во правилата на игра денес, кои се исти како и пред 80, 200, стотици, па и илјадници години во минатото.
Следете, анализирајте, учете, извлекувајте заклучоци. Ама не се воодушевувајте ни на Путинчо, ни на Трамп братот, ни на бедотијата на Европа, ни на докажувањето на лековерноста на зеленашите во Украина. Нема ништо воодушевувачко во ова што се случува.
Не за тебе, Македонецу, бидејќи и твојата судбина секогаш ја решавале на ваков начин. Само, без тв пренос.
(Фејсбук статус на авторот)
Поврзани вести