Фондот за здравствено осигурување (ФЗО) не е само администратор на средства, туку вистински партнер, градител, чувар на стабилноста и двигател на реформите. Мораме да бидеме искрени – во минатото оваа институција имаше сериозно нарушен кредибилитет. Граѓаните гледаа поединци со пари, директори, непресметани трошоци, нетранспарентни одлуки и систем што повеќе личеше на поле за лични привилегии отколку на сервис во служба на луѓето, истакна премиерот Христијан Мицкоски на денешниот настан по повод 25 години од осамостојувањето на ФЗО.
– Полека, но сигурно, во споредба со минатото, ФЗО го враќа својот интегритет. Единствениот пат за тоа е бескомпромисна борба против криминалот и корупцијата, со работа, ред, дисциплина и јасна одговорност. Морам да му честитам на директорот – врши одлична работа, рече Мицкоски.
Премиерот потсети дека кога ја презеле власта, затекнале здравствен систем во тешка состојба: дефицит на кадар, нефункционални установи, недоволна опрема, долги листи на чекање и сериозно нарушена доверба кај пациентите.
– Наместо да бараме изговори, тргнавме во акција. Во изминатата година и половина, Владата покажа посветеност кон јавното здравство. Од првиот ден имавме јасна цел – да го обновиме, модернизираме и хуманизираме здравствениот систем. Во инфраструктурата започнавме нов инвестициски бран: од новата амбуланта во Петровец, преку реконструкција и модернизација на операционите сали во „8-ми Септември“, до низа реконструкции и технолошки обнови на болници низ целата држава, рече Мицкоски.