Премиерот Христијан Мицкоски денеска на свечената академија „Од слово до вечност“ во црквата „Света Софија“ во Охрид порача дека делото на светите браќа Кирил и Методиј и денес испраќа моќна и современа порака – дека секој народ има право на образование, култура, духовен израз и свој јазик.
„Во едно време кога писменоста била привилегија на малкумина, тие испратиле порака која и денес е современа и моќна – дека секој народ има право на образование, култура и на свој јазик. Токму затоа нивното дело е поголемо од историски настан. Тоа е победа на светлината над темнината, победа на знаењето над покорувањето“, рече Мицкоски.
Премиерот предупреди дека народ кој не ја познава својата писменост и култура лесно станува туѓ во сопствената историја.
„Тоа не е само историска поука, ова е и современо предупредување“, истакна тој.
Мицкоски посочи дека во време на брз технолошки напредок, вештачка интелигенција и глобализација, образованието е поважно од кога било досега.
„Вистинското образование не е акумулација на информации, тоа е способност на човекот да разликува вистина од манипулација, вредност од привид. Образованието е најмоќното оружје со кое можеме да го промениме светот, а и најсилниот штит со кој еден народ ја брани својата иднина“, порача премиерот Мицкоски.
Целото обраќање
Свечена академија по повод Денот на сесловенските просветители „Св. Кирил и Методиј“ (ВИДЕО)