„ Ќе видиме што ќе се случува понатаму. Има неколку предизвици, коишто се пред нас не само како држава, туку и пред Европската Унија. Изјавата на еврокомесарката Кос е дадена во поинаква конотација и таа не се однесува на Македонија како држава. Ние имаме целосно усогласена безбедносна и надворешна политика со Европската Унија. Имаме апсолутно целосна доверба во Европската Унија, изјави Мицкоски во одговор на новинарско прашање по потпишувањето на Договорот за проектирање и изградба на интерконективниот гасовод Македонија- Србија.
Тој додаде дека Владата работи на реформската агенда, на исполнување на реформите.
„Во декемврискиот извештај бевме најдобри, очекувам истото да биде и во јунскиот извештај. Продолжуваме во таа насока и во периодот што следи. Тоа што е наша обврска надвор од билатералните услови, ние ќе си го оствариме и ќе бидеме најдобри. И сме најдобри. Така што продолжуваме во тој правец“, рече македонскиот премиер.