Идејата за набавка на нов владин авион не е повлечена ниту пропадната, изјави Томовски во гостување во „Вести плус“ на Канал 5.
Според него, доколку Македонија сака да биде сериозна држава, потребно е да располага со соодветен владин авион. Тој посочи дека леталото не се користи само за потребите на државниот врв, туку и во итни ситуации, како транспорт на пациенти на лекување во странство.
Томовски информира дека за само две години околу два милиона евра биле потрошени за сервисирање на сегашниот владин авион, кој е од 2004 година. Како дополнителен проблем го посочи недостигот од оригинални резервни делови, поради што понекогаш со недели се чекаат репарирани делови.
„Проблемот е што е прилично мал, има само шест седишта и не може да се патува со поголема делегација. Новиот авион што треба да се набави нема да ги има овие проблеми“, рече Томовски.
Тој нагласи дека владиниот авион се користи исклучиво за службени потреби. Трошоците за патувањата на претседателот на Владата, претседателот на државата и претседателот на Собранието ги покрива СОЗР, додека другите институции и министерства плаќаат за користењето.