Новиот претседател на Сојузот на стопански комори на Македонија (ССКМ), Горан Ѓорѓиевски, најави дека организацијата ќе ја почитува казната од 18.500 евра што вчера ја изрече Комисијата за заштита на конкуренцијата, но нагласи дека таа е директен резултат на постапките на претходното раководство во февруари 2025 година, кое работело спротивно на статутот и ги вовлекло коморите во картелско здружување.
„Ова се плодовите на работењето на претходното раководство, кое едногласно беше разрешено на вонредното собрание во јули 2025 година. Како нов претседател, ќе ја почитуваме одлуката на КЗК и изречената казна, но сакам јасно да истакнам: единствено слободниот пазар е параметарот по кој се формираат цените“, порача Ѓорѓиевски.
Тој потсети дека ССКМ повеќе од две децении работи во интерес на компаниите и економскиот развој, секогаш почитувајќи транспарентност и независност, и дека улогата на Сојузот е да обезбедува поддршка и размена на добри практики – никогаш да влијае врз ценовните политики на членките.
Комисијата вчера објави казни од по 50.000 евра за четири трговски друштва и дополнителна казна од 18.500 евра за ССКМ како координатор на картелското однесување.