Градоначалникот на општина Аеродром, Дејан Митески, изјави дека е потребен здрав разум за да се одговори на безобразноста и дрскоста во врска со состојбата со собирањето отпад. Тој нагласи дека ЈП „Комунална хигиена“ – Скопје, под раководство на Данела Арсовска, е одговорно за собирање на сметот, празнење на контејнерите и чистење во сите општини во Скопје, за што граѓаните на Аеродром редовно плаќаат.
Митески посочи дека во населбата Лисиче повеќе од 10 дена не се празнат контејнерите и не се собира отпадот од домаќинствата.
„Како општина поднесовме кривична пријава до Основното јавно обвинителство – Скопје и до Министерството за внатрешни работи. Одговорноста има име и презиме и таа мора да се детектира. Нашите комунални инспектори двапати ги казнија со по 80.000 евра, но попусто – кај нив не владее здравиот разум“, истакна Митески.
Тој додаде дека, иако не е во надлежност на општината, тимовите од Аеродром самоиницијативно чистат на целата територија, од Долно Лисиче до Мичурин.
„Благодарност до општините Илинден, Зелениково, Сопиште, како и до сите општествено-одговорни компании кои помагаат во целиот процес. Ќе издржиме уште 10 дена – Аеродром ќе го исчистиме!“, порача Митески.