One Macedonia, новиот мобилен оператор што влегува на македонскиот пазар, најавува сериозен инвестициски циклус и поинаков пристап кон корисниците, со цел да донесе поголема транспарентност, конкурентност и модерни дигитални услуги. Во интервју за ТВ Алфа, Пал Заранди, претседател на Одборот на директори на „One Macedonia“ и директор за мобилна стратегија во 4iG, истакна дека во првите пет години од работењето се планирани инвестиции повисоки од 100 милиони евра.
Осврнувајќи се на состојбите на пазарот, Заранди посочи дека со најавениот влез на нов оператор, конкурентската динамика ќе се интензивира, при што постојните оператори ќе се обидат да ги задржат своите корисници. Во тој контекст, тој предупреди дека граѓаните може да се соочат со понуди за подолгорочни договори, и апелираше тие внимателно да ги разгледаат своите одлуки пред да се обврзат на подолг период.
- „Не е изненадување што конкурентите ќе настојуваат да ги обврзат корисниците со подолгорочни, дури и двегодишни договори. Затоа, можеби е добро граѓаните внимателно да ги разгледаат своите одлуки пред да се обврзат на долг период“, рече тој.
Планираните инвестиции ќе бидат насочени кон изградба на современа 5Г мрежа, вработување стручен кадар и развој на услуги, при што компанијата веќе инвестирала околу 8 милиони евра за фреквенцискиот спектар и ќе продолжи редовно да ги исполнува обврските кон регулаторните институции.
- „Нашата цел е да изградиме многу ефикасна, модерна и поинаква мрежа, со поголема автоматизација и капацитети, а таа ефикасност да се почувствува и кај корисниците преку подобри услуги и поедноставен пристап“, истакна Заранди.
Посебен акцент ќе биде ставен на цените и на јасноста на понудата. Наместо комплексни пакети и голем број опции, новиот оператор планира ограничен број едноставни и лесно разбирливи тарифи, со цел корисниците полесно да донесуваат одлуки и да имаат целосна транспарентност за тоа што добиваат.
Покрај мобилните услуги, компанијата има амбиции да понуди и домашен широкопојасен интернет базиран на 5Г технологија, особено имајќи ја предвид ограничената конкуренција на пазарот на фиксен интернет во земјава. Со ваквиот пристап, One Macedonia најавува дека ќе се обиде да изгради долгорочна доверба со корисниците и да понуди реална и фер алтернатива на постојните телекомуникациски услуги на македонскиот пазар.