„Експрес.мк.“ ги пренесува покарактеристичните делови на ова интервју.
Затворите во Идризово и во Шутка, каде има поголем шверц?
Па во Идризово, но има подобрување во делот на шверцот. Ако ме прашате дали е задоволителна состојбата, секако не е. Има телефони и дрога, одговорно тврдам дека таму има затворски полицајци што не треба и не заслужуваат да ја носат таа униформа и на неа да стои затворска полиција и Македонија. Но работиме да ја подобриме состојбата. Минатата година за 6 месеци Интервентната единица при претресите најде 1.200 телефони во затворите низ државава. Во Хрватска 2023 година при огромен број претреси беа најдени 26 телефони.
А кој шефува со тој шверц, кој командува и кој ги држи тие полицајци за кои велите дека не ја заслужуваат униформата. Кој со кого соработува, директорите со полицијата, а таа со осудениците или?
Директорите се вмешани, но полицијата со осудените лица, сигурно и тоа е практика, која сме ја имале и претходно. Еве ако земате плата од 1.000 евра и по пат на корупција успеете да заработите уште толку, и вие се навикнувате на скапи одмори, на брзи и лесни пари, на добри превозни средства, на скапа гардероба.. И сега се променила власта и вие треба да се откажете од сето тоа.
Да, но затоа постојат институциите и нивна обврска е тоа да го сопрат, нели, треба да се бориме против корупцијата, а не да навикнуваме на брзи и лесни пари.
Ние, односно јас и најголемиот број на директорите на затворите, максимално работиме да ја сузбиеме таа корупција и да ја доведеме на некое минимално ниво, бидејќи невозможно е целосно да ја искорените. Со претресите од Интервентната полиција имаме голем напредок во овој поглед. Работиме и на тоа во поголемите затвори да направиме Единица за затворско разузнавање, а нивната задача ќе биде добивање информации од луѓе што се занимавале со тероризам, со верски радикализам, повратници од странски боишта. Минатата година се направија измени во Законот за извршување санкции, но и ова само се одложува. Се надевам дека и ова ќе биде изгласано брзо. Многу често пуштав припадници на интервентната полиција да влегуваат во еден затвор и што се случи? Само се зголеми побарувачката и цените на мобилните телефони што се внесуваа. Ако претходно мобилен телефон се внесувал за 200 евра, по ова таа цена порасна на 500 евра и повеќе.
Им го „процветавте“ бизнисот на шверцерите?
Да, дословно да. И сѐ додека има такви затворски полицајци што се корумпирани и додека тие не бидат сместени од другата страна на решетките, ќе го имаме овој проблем. Кога дојдов на функција, зградата на полуотвореното одделение во затворот во Идризово, ново и суперфункционално, беше полупразно. Зошто? Затоа што таму имаше затвореници што по нивниот третман требало да бидат во затворено одделение, а биле сместени во полуотворено одделение и ги истепале сите, се вмрежиле со затворските полицајци и никој, ама никој не сакаше да биде сместен таму, бидејќи ако ве сместат таму, знаете дека ќе ве тепаат, ќе ве рекетираат. Сега тоа не е така. Морам да напоменам дека одредени затвореници се однесувале како во хотел. Сега тоа го нема и секој затвореник е сместен каде што треба. Не постојат повеќе шерифи на затворите, не постои некој што е газда.
Значи имало осуденици што биле поголеми затворски полицајци и од самата полиција на затворите?
Да, точно така беше. Но сега веќе тоа го нема.
За колку пари се шверцуваат мобилни телефони по затворите?
Па, за сума од 100 евра па нагоре. Тоа се цените колку што ми е познато за шверц на мобилни телефони. Да се разбереме дека осудениците 24/7 размислуваат како да го излажат затворскиот систем. Ако јас 15 часа размислувам како да го подобрам, тие 24/7 мислат како да го излажат затворскиот систем. Тоа на нив им е дом и точно го знаат секое дупче на затворот, умеат да се зближат со затворските полицајци и точно знаат кој може да им биде соучесник. Минатата година имавме околу 100 нови затворски полицајци. АНБ правеше проверки и кога дојдов на позицијата директор, имаше поранешни затвореници кои беа затворски полицајци. Дали е можно? Можно е, да, такви луѓе им беа вработени. Сега тоа многу темелно се проверува и не можете да вработите кого било.
Целото интервју тука