Словачкиот претседател Петер Пелегрини изјави дека Словачка ја поддржува европската перспектива на Северна Македонија како пријател, партнер и сојузник, но и дека проширувањето на Европската Унија мора да биде фер, предвидливо и засновано на исти правила за сите кандидати.
На заедничката прес-конференција со македонската претседателка Гордана Сиљановска-Давкова, Пелегрини истакна дека Западен Балкан е многу важен за целата Европа и дека не смее да остане простор за геополитички натпревар и игри.
„Ставот на Словачка е јасен – стабилен, просперитетен и европски ориентиран Западен Балкан е во стратешки интерес за целата Европа. Поддржуваме европски пат за Северна Македонија, но истовремено веруваме дека довербата во Европа се темели на правила и добрососедски односи“, рече Пелегрини.
Тој додаде дека ниту една земја, вклучително и Украина, не смее да има предност и да влезе во Унијата по скратен пат, туку сите мораат да го поминат истиот процес на реформи и преговори.
„Затоа, земјите кои имаат право да станат членки на Европската Унија првенствено се земјите од Западен Балкан, вклучително и Северна Македонија. Нема да поддржиме никакви скратени патишта ниту привилегии за одредени земји пред други“, нагласи словачкиот претседател.
Претседателката Сиљановска-Давкова е во официјална дводневна посета на Словачка.