Обилните врнежи што ја зафатија земјава предизвикаа сериозни поплави во западните и северозападните региони. Излеани се повеќе реки, поплавени се куќи, подруми, дворови и земјоделски површини, а на повеќе места е оштетена и инфраструктурата. Најкритична е состојбата во Гостиварско и Кичевско, каде што водата навлезе во десетици домови, а дел од населението беше евакуирано.
250 евакуирани во Кичево
Во Кичево, по излевањето на Зајашка Река, беа евакуирани околу 250 лица, меѓу кои 61 дете и 11 лица со инвалидитет. Најпогодени се жителите на улицата „Прилепска“ и населбата Подварош. Дел од објектите на кичевската болница исто така се зафатени од вода. Евакуираните се сместени во спортската сала „Христо Узунов“, каде што им се обезбедени основни услови за престој, храна и вода. Според податоците, вкупно 362 домаќинства со околу 1.200 жители се соочуваат со последиците од поплавите.
Интервенции на повеќе локации
Во Гостиварско најпогодено е селото Форино по излевањето на Вардар. Поплавени површини има и во Чајле, Турчане, Врапчиште и Беловиште. Противпожарните екипи интервенирале цела ноќ.
Во Липковско, поради излевање на Слупчанска Река, поплавени се земјоделски површини во Опае и Оризаре. Во Кумановско внимателно се следи состојбата со Кумановска Река, а во скопската општина Сарај, каде претходно беа поплавени над 30 куќи, состојбата постепено се стабилизира.
Минимално излевање на Вардар е забележано и во Зелениково, засега без директна опасност за домовите.
Реките и натаму на критично ниво
Водостојот на Вардар во горниот тек останува исклучително висок, а ризикот од нови излевања е реален. Реката Треска и покрај благо намалување, сè уште е на критично ниво. Зголемен водостој бележи и Црна Река, со можност за локално заезерување во Демирхисарско и Пелагонија.
Се очекува висок водостој и во средниот и долниот тек на Вардар, кон Демир Капија и Гевгелија.
Предупредување за дополнителна опасност
Од ЈП „Национални шуми“ предупредуваат дека уништените шумски појаси, особено на Скопска Црна Гора, може дополнително да ги засилат последиците од поројните дождови.
– Доколку продолжат обилните врнежи, поради намалената природна заштита од ерозија, може да дојде до силни порои и нови поплави – предупредуваат од претпријатието.
Следуваат нови врнежи и силен ветер
Според прогнозата, врнежите ќе продолжат и во текот на утрешниот ден, повремено со пообилен интензитет. На планините се очекува снег, а на повисоките места мешан дожд и снег. Во источните делови постојат услови за ретки грмежи.
Ќе дува засилен, повремено силен северен ветер, што дополнително може да ја влоши состојбата.
Црвениот крст на терен
Волонтерите на Црвениот крст се активно вклучени во обезбедување хуманитарна помош – топли оброци, вода, душеци, ќебиња и хигиенски средства. Покрај материјалната поддршка, тие нудат и психосоцијална помош за погодените семејства.
Надлежните институции апелираат граѓаните да бидат крајно внимателни, да избегнуваат движење покрај реки и суводолници и редовно да ги следат официјалните информации, додека опасноста од нови излевања сè уште не е целосно надмината.