Коцарев, роден во Охрид во 1890 година, бил еден од пионерите на радиотерапијата и радиографијата, соработувал со нобеловката Марија Кири и истовремено активно се залагал за македонската кауза преку студентските и политичките друштва во Швајцарија и Франција. Претседателката Сиљановска Давкова истакна дека признанието ѝ е повеќе потребно на државата отколку на Коцарев.
– Нам ни е повеќе потребна наградата одошто нему, оти медицинскиот великан и луцидниот општественикот со блескав ум, кој бил далеку пред времето, ја легитимира малата држава како негова татковина на научникот од светски глас, со којшто се гордееме, кого го почитуваме и го наградуваме – рече таа.
Сиљановска-Давкова додаде дека личноста на Коцарев е симбол на спојот меѓу науката и патриотизмот. -Коцарев е синоним за содејство меѓу прекрасниот ум, продорната мисла и храброто дејствување. Тој не е само македонски, туку и француски, швајцарски и светски научник. Со оваа посмртна награда и со обележјето на куќата, во која што е роден, ќе го вратиме Анастас Коцарев дома. А Охрид ќе добие уште еден великан – дополни претседателката на Македонија.
Од името на семејството и Здружението на заборавени Македонци Соња Коцарева Трпезановска нагласи дека признанието е чин на враќање на Коцарев во македонскиот Пантеон на вечноста.
-Денес овде кога душата ни е преполна со радост и гордост што присуствуваме на овој настан со кој после долги години се оддава највисока почест на еден светски признат научник и голем патриот, ние потомците на д-р Анастас Коцарев одлучивме овој орден да го отстапиме на музејот во Охрид заедно со неговата слика со оригиналниот потпис. Иако долги години работеше во Швајцарија и Франција, неговата најголема желба беше да се врати во Охрид. Се надевам дека понатака државата ќе направи напори за негово конечно враќање во Македонија, во неговиот сакан Охрид, каде што секоја година достоинствено ќе чествуваме – посочи таа.
Орденот „Илинден – 1903 година“ е едно од високите државни одличја на Република Македонија, кое го доделува претседателот на државата. Востановен е во чест на Илинденското востание од 1903 година и се доделува за исклучителни заслуги во борбата за национално и социјално ослободување, за придонес во изградбата на државноста, суверенитетот и независноста, како и за јакнење на општествениот и државно‑правниот развој. Орденот може да се додели и посмртно.