Претседателката Гордана Сиљановска Давкова упати остра порака до организацијата на Обединетите Нации по повод јубилејот 80 од основањето на светската организација.
Во пораката до Обединетите нации Сиљановска Давкова порачува дека светската организација опасно се приближува до критична точка до која пред втората светска војна дојде Лигата на народите која беше претходник на ОН.
Во видео пораката од претседателката Сиљановска-Давкова по повод 80. годишнината од основањето на ООН таа предупредува дека не смее да се случи силните народи и држави да го прават што можат, а слабите да го трпат што мораат.
Целата порака во продолжение
Превод на македонски јазик од видео пораката
Екселенции,
Дами и господа,
Пред осумдесет години, Обединетите Нации се издигнаа од урнатините на Втората светска војна за да спречат идни војни, да го прекинат колонијализмот, да ги почитуваат човековите права, да ја унапредат правдата и меѓународното право. Нивната Повелба ја зацврсти суверената еднаквост на државите. Нејзините агенции се стремеа да создадат подобар свет, градејќи мир не само меѓу народите, туку и со природата.
Осумдесет години подоцна, многу од овие достигнувања, за жал, се поткопани. Мултилатералниот систем заснован на правила сега е распукан од тежината на растечката мултиполарност. Поради тоа што се сѐ повеќе парализирани кога е најпотребно, Обединетите нации опасно се приближуваат до „моментот на Лигата на народите“, до стариот светски поредок во кој силните прават што можат, а слабите трпат што мораат. Македонските граѓани искусија некои од овие двојни стандарди уште од првиот ден на нашето членство во ОН во 1993 година.
Сепак, веруваме дека малите земји треба да бидат најголемите поддржувачи на ефективниот мултилатерализам со реформирани и силни ОН во центарот. Го усвоивме Пактот за иднината како обновен глобален општествен договор, бидејќи сите страни споделуваат одговорност не само во почитување на своите права, туку и имаат и должност да се грижат за системот.
Оваа 80. годишнина е повик за будење за да ја потврдиме нашата посветеност на Повелбата на ОН и нејзиниот меѓународен поредок заснован на правила. Од нас зависи дали ОН ќе се справат со предизвиците и ќе продолжат да градат иднина на мир, правда и напредок на здрава планета.
Среќен роденден, Обединети Нации!