Правилникот за организација на натпревари при Европската ракометна федерација (ЕХФ) ги прави беспредметни обвинувањата од АЕК до „локалните власти на Скопје“ во врска со влезниците за гостинските навивачи, крунскиот аргумент да не го одиграат синоќешниот реванш со Алкалоид од финалето на Европскиот куп.
Постапката во врска со билетите за гостинскиот тим регулирана во членот 39.2, кадешто првиот став вели: „Домашните клубови треба да стават на располагање 10% (минимум 200 билети) од билетите за влез на гостинските клубови, со плаќање на вообичаената локална цена“.
Токму тој минимум од 200 влезници го обезбеди Алкалоид за фановите на атинскиот клуб, но оттаму побарале неколкукратно поголем број карти, па откако не добиле, решија да не излезат на теренот во арената „Борис Трајковски“, со вкупен капацитет од 6.171 место за седење.
Ако сакале повеќе билети од одредените од домаќинот Алкалоид, тоа морале да го сторат најмалку десет дена претходно, а не на денот на натпреварот.
„Целосниот број билети мора да биде нарачан од гостинскиот клуб во писмена форма најдоцна десет (10) дена пред натпреварот. Доколку до тој датум не се прими нарачка за билети, билетите може да ги продава домашниот клуб без никакви ограничувања (видете точка 38)“, обврзува вториот став од членот 39.2 од Правилникот.
На првиот меч во Атина домаќинот му додели 170 билети на Алкалоид, далеку помалку од 10 отсто од вкупно 8.327, колку што е капацитетот на „СУНЕЛ арената“, но македонскиот претставник излезе на терен и, наспроти сите провокации, недолични скандирања и фрлени пластични шишиња со вода, победи со 29:25.