Обединетата македонска организација „Илинден“ – ПИРИН реагира за недоличните коментари и за говорот на омраза против Македонците од Бугарија и нивните гости од Република Македонија и од Егејска Македонија што вчера во Мелник присуствуваа на одбележувањето на 111-годишнината од убиството на македонскиот револуционер Јане Сандански.
„Говорот на омраза од бугарските групи и поединци со омраза мора да се оспори.
Кога македонскиот народ се собира да го одбележи својот национален херој преку песни и ора, да ја прослави културата, единството и гордоста.
Обидите на бугарските јавно организирани групи на омраза да ја задушат оваа радост со навреди и непријателство само го откриваат стравот и нетолеранцијата.
Ако вака се однесуваат јавно, можете да замислите како изгледа секојдневниот живот на Македонците што живеат во Бугарија.
Нè навредуваат со зборови како предавници, имбецили, неписмени, идиоти, ѓубре, тиради, продадени, србомани, мајмуни, скапани стари торби, комунисти… итн. Ни посакуваат смрт, повикуваат на етничко чистење, се закануваат дека ќе нè тепаат, ја повикуваат полицијата да нè тепа, нивната влада да нè репресира…
Ние се спротивставуваме на омразата, се залагаме за почит и никогаш нема да дозволиме гласовите на поделба да го замолчат нашето наследство.
На крајот на краиштата, дали ова се културните вредности што #ЕвропскаУнија ѝ ги додели на Бугарија?
Да нè негира, да нè дискриминира, јавно да шири шовинизам против македонското малцинство?
Сето ова претставува кривично дело според бугарскиот Кривичен законик.
Подготвивме мал колаж од коментари собрани само од нашите последни два објави, па да се надеваме дека властите во Бугарија, Бугарскиот хелсиншки комитет, Дипломатскиот кор ќе реагираат на овој феномен, кој е толериран од властите со децении. Со тоа, тие ги охрабруваат јавно да го сторат ова против нас“, велат од организацијата на Македонците од Бугарија.