Градоначалникот на Град Скопје, Орце Ѓорѓиевски во НАТКАСТ открива каква состојба затекнал – три плати немаа земено вработените во „Комунална хигиена“, како во некои претпријатија немаа земено и по 4 плати, 16 функционални камиони и ниту еден контејнер оставен вишок за да може да го промениме на одредена микро локација. Вели дека во Скопје проблемот е од два аспекти.
- Првиот аспект на проблемот беше предизвикан поради немање на механизација, 16 камиони имавме функционални, а вториот аспект затоа што на микро локација каде треба да имате по 6 контејнери, сега има по еден или по два, најмногу по три контејнери. Што значи дека и граѓаните се приморани надвор од контејнерите да го одлагаат отпадот. Веќе сме во финална фаза на избор на оператор кој треба да обезбеди 2600 нови контејнери за градот Скопје кои во наредниот период ќе ги покријат потребите кои не беа покриени години наназад, но и ќе го сменат и ликот во централното градско подрачје, каде знаете дека има контејнери на кои не им е местото таму. Скопје е град во кој што живеат над 600.000 жители, а ние имаме и голема бројка на туристи кои доаѓаат. Грда е сликата која ја оставаме и преку тие микро локации каде се поставени контејнерите, рече Ѓорѓиевски.
Тој истакна дека има потпишан договор и за нови 40-тина камиони за „Комунална хигиена“. Повеќе детали погледнете во видео интервјуто во продолжение.