Во Радожда е избегната трагедија, откако огромна карпа тешка меѓу 10 и 15 тони се урна на самиот регионален пат кој води кон селото. Жителите предупредуваат дека половина село живее буквално под надвиснатите карпи и стравуваат дека следниот одрон може да биде кобен.
Само среќата спречила катастрофа, бидејќи во моментот на одронот, на неколку метри од местото поминувале жители со мали деца.
„Многу ризично е да се живее во ова село, пошто никој за ништо не се секира. Можеше вчера да настрадаат луѓе, затоа што карпата падна на самиот пат. Да имаше поголема фреквенција на патов, не знам што ќе се случеше. Половина село е загрозено, бидејќи живее под карпите. Во секој момент може да има ист случај“, вели Михајло Солакоски, жител на селото.
Жителите револтирано посочуваат дека ова не е прв случај и предупредуваат дека со години наназад паѓаат карпи. Дел од мештаните велат дека ваквата состојба е резултат и на долгогодишна негрижа, но и на неконтролирана изградба.
„Ова е дефинитивно сублимат на неколку фактори. Не е само негрижата на државата во изминатиот период, туку постои и негрижата на самите жители, односно алчноста да се искористи сè што може да се искористи. Мора да признаеме дека сакаме секоја педа да ја изградиме“, вели Петко Кутаноски, жител на Радожда.
Жителите сами поставуваат бетонски заштити за да се спасат од нови одрони, додека од државата бараат итна интервенција и стручна проценка.
„Ќе побараме од надлежните органи, па дури и од Градежниот факултет, да испратат експерти за увид на состојбата. Јас лично вчера се искачив горе и снимив уште две до три карпи, некои и поголеми од оваа што падна. Состојбата е алармантна“, вели Александар Јулоски, претседател на месната заедница Радожда.
Инаку, во 2021 година само чудо го спаси семејството Пејоски од огромните карпи кои се одделија од планината и се урнаа врз помошните простории. И кај населбата Елен Камен се урна карпа која за малку ќе паднеше врз автобус со работници од Струга.
Сега, за првпат, надлежните реагирале брзо и патот бил расчистен за помалку од еден час. Но, тоа не го решава проблемот. Жителите бараат итно решение за карпите над Радожда и Елен Камен, бидејќи ова е единствениот пат до селото, а воедно и едно од најатрактивните туристички места во регионот.