По повод одбележување на 11 Октомври – Денот на антифашистичкото востание на македонскиот народ денеска во Прилеп ќе биде одржана свечена академија под мотото „На вистинската патека, за татковина со иднина“. Претседателот на Владата на Република Македонија Христијан Мицкоски ќе има обраќање на свечената академија со почеток во 12 часот и 30 минути.
Во рамки на чествувањето на овој светол чин од македонската национална историја во 9 часот во Скопје ќе биде положено цвеќе во Меморијалниот комплекс „Партизанските гробишта“ на градските гробишта во Бутел, во организација на Министерството за одбрана.
Во Собранието на Република Македонија во 12 часот ќе биде доделена државната награда „11 Октомври“ на добитниците за 2025 година.
Во рамки на одбележувањето на 11 Октомври – Денот на антифашистичкото востание на македонскиот народ ќе биде положено цвеќе и во во Прилеп пред споменикот на Методија Андонов-Ченто (во 10 часот), пред споменикот на Кузман Јосифовски-Питу (во 10 часот и 20 минути), пред споменикот „Жена Борец“ (во 10 часот и 50 минути) и пред Могилата на непобедените (во 11 часот и 25минути).
Исто така, денеска ќе биде положено цвеќе и пред Спомен-костурницата во Куманово во 11 часот.