Дритон Сулејмани, портпарол на партијата ВРЕДИ, ја обвинува албанската опозициска партија ДУИ дека го блокира донесувањето на Законот за правична и соодветна застапеност. Според Сулејмани, овој закон е еден од главните делови од спроведувањето на Охридскиот договор и, како што рече, изненадувачки е што ДУИ не поддржува такво законско решение.
Сулејмани рече дека ДУИ имала можност да го реши ова прашање во текот на двете децении додека била на власт, но не го сторила тоа. Тој тврди дека сега, кога се прави обид да се воспостави нова законска рамка за правична и соодветна застапеност, ДУИ го попречува процесот.
„Иста е ситуацијата и со Законот за фер и соодветна застапеност, кој ја унапредува фер и соодветната застапеност, ја става од категоријата механизам во правна категорија и едноставно сме изненадени како ДУИ се впушта во такво однесување, кое не е пристојно и кое мислам дека е и против интересите на Албанците во Македонија, едноставно сме изненадени како толку лесно велат дека нема да го донесеме овој закон, ќе го блокираме овој закон.
Тоа е исто како да го блокираме законот за јазици, тоа е исто како да ја блокираме децентрализацијата, сето ова се суштински делови од Охридскиот договор“, изјави Сулејмани.
Сулејмани се надева дека ДУИ, како што рече, конечно ќе се освести и ќе размисли за својот став кон Законот за фер и соодветна застапеност.
Тој направи споредба со донесувањето на Законот за употреба на јазиците во 2018 година, нагласувајќи дека во тоа време, како опозиција, процениле дека законот не е идеално решение и не го решава целосно прашањето за албанскиот јазик, но според Сулејман, иако го критикувале законот, го поддржале за да направат чекор напред во решавањето на ова прашање.