Поранешниот премиер на Грција, Алексис Ципрас, денеска објави дека официјално ќе ја претстави својата нова политичка партија на 26 мај, пишува грчкиот весник „Прото Тема“.
Во видеото објавено на платформата Х, две момчиња се појавуваат на фудбалскиот терен со дресови на кои се истакнати броевите „26“ и „5“, симболично најавувајќи го датумот на лансирањето на новата партија.
„Ниту прерано, ниту прекасно. Сега е време“, порача Ципрас.
Грчките медиуми пишуваат дека Ципрас во изминатите денови објавил видео-пораки од свои поддржувачи на социјалните мрежи, кои го повикуваат да се врати во активна политика, со пораки дека „во март било рано“, а „во септември ќе биде доцна“.
Новото политичко позиционирање на Ципрас дополнително ги комплицира односите во опозицијата, особено во редовите на ПАСОК и СИРИЗА. Анкетите на јавното мислење покажуваат дека во некои мерења Ципрас ужива поголема поддршка од актуелниот лидер на ПАСОК, Никос Андрулакис, а некои истражувања сугерираат дека неговата нова партија би можела да го престигне ПАСОК.
Посебно внимание привлекува и политичкото активирање на Марија Каристиану, поранешната претседателка на Здружението на семејствата на жртвите од железничката несреќа во Темпе, која оваа недела во Солун ќе ја претстави основачката декларација на својата партија. Според истражувањата, таа привлекува гласачи од различни политички страни и помладата популација.
Ούτε νωρίς ούτε αργά,
τώρα είναι η ώρα. pic.twitter.com/glgqSsKLlO— Αλέξης Τσίπρας – Alexis Tsipras (@atsipras) May 18, 2026