Српскиот претседател Александар Вучиќ рече дека Србија останува на европскиот пат, но ја омаловажи посетата на делегацијата на ЕП оваа недела, велејќи дека е составена од „неважни луѓе“. Тој ја обвини проевропската опозиција дека работи против земјата и побара од владата да формира оперативен тим за европска интеграција. По враќањето од Давос, Вучиќ изјави за провладината ТВ Прва дека имал „поважни состаноци“ на форумот во Швајцарија отколку разговорите на европратениците во Белград.
Тој го обвини проевропскиот дел од парламентарната опозиција за „дрско и неодговорно однесување“ затоа што, во разговор со делегацијата на ЕП, побарала од ЕУ санкции за функционерите во Србија вмешани во корупција, криминал и репресија врз демонстрантите и невладините активисти. Вучиќ додаде дека деветчлената делегација на Комитетот за надворешна политика на ЕП е составена од „неважни луѓе, кои се исто така неважни во своите земји, важни само за нашата опозиција“.
Подоцна во текот на денот, Вучиќ, на проширената владина седница, која практично ја водеше тој, а не премиерот Ѓуро Мацут, кој го покани да учествува, побара формирање на помал оперативен тим кој ќе се занимава со европската интеграција и ќе го известува секојдневно за тоа што е направено на европскиот пат.
Тој тим, како што предложи Вучиќ, треба да го предводи амбасадорот во Брисел, Даниел Апостоловиќ, а да го сочинуваат министерот за европска интеграција Немања Старовиќ, министерот за правда Ненад Вујиќ, претседателката на српскиот парламент Ана Брнабиќ и неколку други функционери.
Сумирајќи ја посетата на европратениците во петокот вечерта, шефицата на делегацијата на ЕП, Марта Темидо, изјави дека ЕП „силно го поддржува членството на демократска Србија во Европската унија и дека Србија е приоритет за европратениците, што е и причината за посетата на Белград“. Темидо пред новинарите нагласи дека напредокот на европскиот пат „бара целосно почитување на вредностите на ЕУ, демократијата, владеењето на правото и основните права“ и „спроведувањето и примената на реформите“.
Слободата на медиумите, изборните реформи, одговорноста и слободата на изразување се „најдобрите алатки за ублажување на поларизацијата и враќање на довербата на граѓаните во институциите“, рече Темидо и нагласи дека делегацијата на ЕП добила „загрижувачки извештаи“ за репресијата врз демонстрантите и академската заедница.
