Ракометарите на Еурофарм Пелистер го совладаа Вардар со 32:30 во Скопје и 70-годишниот јубилеј од основањето на клубот го зачинија со деветтата шампионска титула, трета во низа во македонската Суперлига.
„Црвено-црните“, на кои пред директниот дуел од последното коло им одговараше и реми, долго имаа водство во исполнетата арена „Јане Сандански“, во првото полувреме и со максимални 15:10, во завршницата влегоа со 29:28, но финишот им припадна на гостите.
Клучен за победникот се покажа одбранетиот седмерец од Никола Митревски на вардаровото лево крило Марко Срдановиќ при водство на битолчани од 30:29 седумдесетина секунди до крајот, а со реализираниот пенал од Дејан Манасков 20 секунди до крајот пелистерци стигнаа до недостижна предност.
Капитенот Филип Кузмановски со 7 гола беше најефикасен играч во победничкиот тим, а во поразениот Вуко Борозан со 8.