Израелскиот премиер Бенјамин Нетанјаху луто изреагира откако вчера Велика Британија, Канада и Австралија ја признаа државата Палестина.
„Имам јасна порака за оние лидери кои признаваат палестинска држава по ужасниот масакр од 7 октомври – вие давате огромна награда на тероризмот“, рече тој. „Имам уште една порака за вас – тоа нема да се случи. Нема да има палестинска држава западно од реката Јордан“, додаде тој.
Нетанјаху вели дека „со години го спречувал воспоставувањето на оваа терористичка држава, и покрај притисокот“. „Вистина е, ги дуплиравме еврејските населби во Јудеја и Самарија – и ќе продолжиме по тој пат“, додаде тој.
Израелскиот лидер, исто така, рече дека „одговорот на најновиот обид за наметнување терористичка држава во срцето на нашата земја“ ќе дојде еден ден по неговото враќање од Соединетите Држави, каде што ќе присуствува на Генералното собрание на ОН во Њујорк оваа недела.
Одлуката на трите земји да ја признаат Палестина ги става заедно со околу 140 други земји кои исто така ги поддржуваат аспирациите на Палестинците да создадат независна татковина од териториите окупирани од Израел.
Вчера и Португалија ја призна Палстина а се очекува и други земји, вклучувајќи ја и Франција, да го следат примерот оваа недела на Генералното собрание на ОН во Њујорк.
Одлуката на Велика Британија имаше посебна симболична тежина со оглед на нејзината централна улога во создавањето на Израел како модерна нација по Втората светска војна.
Крајнодесничарските израелски министри Итамар Бен Гвир и Безалел Смотрих повикаа на анексија на Западниот Брег како одговор на признавањето.
Министерството за надворешни работи на Израел соопшти дека ја отфрлило „едностраната“ декларација од западните земји за признавање на палестинска држава.
„Израел категорично ја отфрла едностраната декларација за признавање на палестинската држава презентирана од Обединетото Кралство и други земји“, објави министерството. „Оваа декларација не промовира мир; напротив, дополнително го дестабилизира регионот и ги поткопува шансите за постигнување мирно решение во иднина“, се додава во соопштението, осудувајќи ја одлуката како „награда за најголемиот масакр врз Евреите од Холокаустот“.
„Оваа одлука е спротивна на секоја логика на преговорите и барањето компромис меѓу двете страни и дополнително ќе нè оддалечи од посакуваниот мир“, продолжи во соопштението.
„Доколку земјите што ја потпишаа оваа декларација навистина сакаат да го стабилизираат регионот, тие мора да ги фокусираат своите напори на притисок врз Хамас веднаш да ги ослободи заложниците и да го положат оружјето“, се додава во соопштението на министерството.