Шефот на агенцијата на ОН за палестински бегалци (UNRWA), Филип Лазарини, ја критикуваше шемата за дистрибуција на помош што Хуманитарната фондација за Газа (GHF) поддржана од САД, ја спроведува од крајот на мај, кога Израел ја укина 11-неделната блокада.
„Таканаречената шема за дистрибуција на GHF е садистичка стапица за смрт. Снајперистите пукаат неселективно во толпата како да имаат дозвола да убиваат“, рече тој, пренесе Гардијан
Лазарини уште предупреди дека персоналот на UNRWA, лекарите и хуманитарните работници се онесвестуваат на должност во Појасот Газа од глад и исцрпеност.
Агенцијата соопшти дека добила десетици итни пораки од својот персонал во кои се опишани тешките услови за живот и работа во енклавата.
„Никој не е поштеден: На оние што им помагаат на луѓето во Појасот Газа им е потребна помош. Лекарите, медицинските сестри, новинарите и хуманитарните работници се гладни“, предупреди шефот на UNRWA, Филип Лазарини, пренесе неговиот портпарол на брифингот во Женева.
„Многумина се онесвестуваат од глад и исцрпеност додека ги извршуваат своите должности: известуваат за злосторства или ги ублажуваат страдањата“.