Најмалку 64 лица беа убиени во полициска операција против бандата Црвена команда (Comando Vermelho) во северните предградија на Рио де Жанеиро – најголемата и најсмртоносна акција во историјата на бразилската држава, јави Би-Би-Си.
Четири полицајци беа меѓу убиените за време на операцијата „Континуитет“ во сиромашните делови од градот (фавели) Алемао и Пења, изјави гувернерот на државата Клаудио Кастро. Уапсени се повеќе од 80 лица.
Жестоки судири избувнаа кога околу 2.500 припадници на безбедносните сили влегоа во фавелите вчера.
Црвената команда одговори со огнено оружје, палење барикади и фрлање бомби од беспилотни летала, соопштија официјални лица.
Канцеларијата за човекови права на ОН соопшти дека е „ужасна“ од полициската операција, повикувајќи на „брзи и ефикасни истраги“.
Северот од градот е во хаос: пукање, палење автомобили, жителите се плашат да ги напуштат своите домови.
Картелите користат FPV дронови за блокирање на областите.Дроновите се модифицирани за да фрлаат мали експлозивни направи врз полициските тимови. Градинките, училиштата и здравствените установи во областите се затворени.
Телевизијата Globo, која има голема мрежа во Рио, ја опишува ситуацијата во градот како „граѓанска војна“.
Гувернерот Клаудио Кастро го обвини претседателот Лула да Силва дека одбива да испрати војска. Кастро побара, покрај војниците, во градот да влезат и оклопни возила.