Некогашниот бугарски цар и експремиер Симеон Сакскобурготски се сретнал со претседателот на македонската влада Христијан Мицкоски за време на Форумот за проширување на Европската унија што минатите два дена се одржа во Брисел, од кадешто за бугарските медиуми испрати, како што вели, „политички некоректна“ порака во врска со западниот сосед.
„Вчера случајно се видовме со премиерот и ми беше многу мило. Сметам дека дијалогот во секој поглед е позитивен. Добрососедските односи се само од корист на сите. Мораме да вложуваме напори. Повторно ќе кажам нешто политички некоректно – верувам дека многу теми би биле за следење и испитување од страна на историчарите, а ние треба да гледаме на практичното и Северна Македонија да влезе во ЕУ“, изјави Сакскобурготски, цар на Бугарите од 1943 година до укинувањето на монархијата во 1946 година, како и премиер од 2001 до 2005 година.