Македонската православна црква – Охридска архиепископија (МПЦ-ОА) под своето официјално име беше претставена на денешната божествена литургија во храмот „Христос Спасителот“ во Москва во чест на 80. роденден на Неговата Светост Кирил, Патријарх Московски и на цела Русија.
Заедно со претстојателите и претставниците на помесните православни цркви, како и со мноштвото епископи и свештенство на Руската православна црква, во името на МПЦ-ОА на литургијата сослужуваа митрополитот дебарско-кичевски Георгиј и епископот хераклејски Климент.
На аеродромот „Шереметјево“ во Москва тие беа пречекани од архиепископот Теофилакт и од соработникот на Одделот за надворешни црковни врски на Московската Патријаршија, С.А. Бекешченко.
Посетата на македонската делегација ќе трае до 24 ноември, а се реализира со благослов на архиепископот охридски и македонски г.г. Стефан.
Во рамки на престојот во Москва, предвиден е и прием во резиденцијалниот Свето-Данилов манастир, каде што македонските архијереи ќе остварат средба со рускиот патријарх, соопшти Синодот на МПЦ-ОА.
Програмата на посетата предвидува и посета на неколку московски светии.
Поглаварот на РПЦ, Кирил, на функцијата е избран на 27 јануари 2009 година, а устоличен на 1 февруари 2009 година.