Надежите на американскиот претседател Доналд Трамп за брз самит во Будимпешта со рускиот лидер Владимир Путин би можеле да пропаднат откако подготвителниот состанок меѓу Марко Рубио и сергеј Лавров беше одложен, објави Си-Ен-Ен.
Трамп постојано повторува дека сака мир во Украина, иако исто така рече дека смета дека тоа е потешко од постигнување прекин на огнот во Газа или прекин на краткиот конфликт меѓу Индија и Пакистан.
По разговорот со Путин минатата недела, тој рече дека американскиот државен секретар Марко Рубио и рускиот министер за надворешни работи Сергеј Лавров ќе се сретнат.
Но, функционер на Белата куќа, кој зборуваше под услов да остане анонимен, рече дека очекуваниот состанок засега е одложен.
Изворот рече дека Рубио и Лавров имаат различни очекувања за тоа како би можела да заврши војната.
Си-Ен-Ен забележува дека не е јасно какво влијание ќе има одложувањето на состанокот Рубио-Лавров врз планираниот самит Трамп-Путин во Будимпешта.
Очекуваната средба меѓу Рубио и Лавров се сметаше за клучен подготвителен чекор за вториот самит меѓу Трамп и Путин оваа година.