Синдикатот на работниците во комуналните дејности (СУТКОЗ) и Сојузот на синдикатите на Македонија (ССМ) издадоа предупредување за алармантната состојба во Јавното претпријатие „Комунална хигиена“ – Скопје, каде што платите на вработените доцнат со месеци, а недостигот од возила за собирање отпад и резервни делови го отежнува редовното работење.
Според соопштението на синдикатите, иако граѓаните редовно ги плаќаат сметките за комунални услуги, а средствата пристигнуваат на сметката на претпријатието, платите на вработените се исплаќаат со значително задоцнување.
-И покрај тоа што се доцни со исплатата на платата за септември, вработените редовно ги извршуваат своите задачи со ограничени ресурси- изјавија од СУТКОЗ.
На состанокот на Извршниот одбор на синдикалната организација при ЈП „Комунална хигиена“, одржан на 21 октомври 2025 година, биле поканети раководството и Управниот одбор на претпријатието, но директорот не се појавил. Синдикатите нагласуваат дека одговорноста за проблемите не лежи кај вработените, туку кај раководството, кое не успева да обезбеди доволно средства за нормално функционирање на претпријатието.
-Ќе ги преземеме сите мерки против раководството, согласно законите и колективните договори – од кривични пријави до иницијативи пред Инспекторатот за труд- соопштија од СУТКОЗ и ССМ, потенцирајќи дека ќе внимаваат овие активности да не го загрозат здравјето на вработените или граѓаните на Скопје.
Синдикатите апелираат за итно решавање на состојбата, со цел да се обезбедат редовни исплати и потребните ресурси за непречено собирање на отпадот во главниот град.