Машката ракометна репрезентација на Македонија го заврши својот настап на 14. место во конкуренција на 24 учесници на 17. Европско првенство во Данска, Шведска и Норвешка.
Од 12. селекции што не се пласираа во главната фаза по групи само Македонија и Фарски Острови освоија по 3 бода, а островјаните се 13. поради подобрата гол-разлика од +10 наспроти -11 на „црвено-жолтите“.
Зад Македонија се Холандија, Италија, Чешка, Австрија, Србија, Полска, Романија, Украина, Црна Гора и Грузија.
Во своето деветто учество на европските шампионати избраниците на селекторот Кирил Лазаров денеска се одјавија со победа од 24:23 над Романија.
Два дена претходно ремизираа 29:29 со Португалија, четврта на ланското СП и сензационален победник вечерва над светскиот и олимписки шампион Данска со 31:29, од кој македонските ракометари на стартот загубија со 36:24.