Во колумна насловена „Идентитет – тоа звучи гордо“ објавена во бугарскиот весник „Труд“ тамошниот писател и пиблицист Иван Стамболов-Сула се потсмева со македонскиот.
„Луѓето од РСМ имаат историја помлада од нивната претседателка, но нивниот идентитет се појавил 0,00001 секунда пред Големата експлозија. Зборуваме за нивниот национален идентитет“, пишува тој.
„Жителите на РСМ се постари од вселената и пишувале на кирилица 6.000 години пред Кирил и Методиј, само од десно кон лево“, додава колумнистот во друг дел од текстот.
„Ами Србите? Постои цела српска псевдоисториска традиција, според која Србите не дошле на Балканот во 6-7 век, туку се автохтоно население од длабоката антика. Значи, Македонците можеби се современици на Големата експлозија, но сепак се дојденци тука“, вели Сула во провокативниот напис во кој Македонците ги означува како „таканаречени“ и тоа во наводници.
„Во некоја смисла, ние Бугарите не сме помалку смешни од другите балкански народи. Навикнати сме да се потсмеваме на таканаречените „Македонци“, но останатите, вклучувајќи нè и нас, не се многу различни“, заклучува тој во писанието објавено и на неговиот блог, а илустрирано со Александар Македонски во македонска носија со знаме со карта на Балканот и со вселената одзади.