По 57 дена поминати во затвор, Врховниот суд ги укина пресудите на Основниот кривичен суд Скопје и на Апелацискиот суд Скопје против поранешниот градиначалник на Општина Карпош, Стевчо Јакимовски, и го врати случајот на повторно постапување и одлучување пред првостепениот суд.
Советот за казниви дела на седница одржана вчера го уважил барањето на Јакимовски за вонредно преиспитување на правосилната пресуда, поднесено преку неговиот бранител Виктор Цветковски од Куманово.
Јакимовски во април 2025 година првостепено беше осуден на единствена казна од три години и шест месеци затвор за две кривични дела – бесправно градење и злоупотреба на службената положба и овластување, во предмет поврзан со изградбата на административниот објект на Општина Карпош.
Првостепениот суд тогаш одлучи и административниот објект на локалната самоуправа на улицата „Радика“ бр. 9 да биде одземен во корист на државата.