По пресудата на Врховниот суд за царините во САД и новите најави од претседателот Доналд Трамп, царинскиот договор со ЕУ од минатата година е ставен на пауза. Широко мнозинство пратеници во Европскиот парламент се изјаснија за запирање на спроведувањето на договорот. Парламентот засега нема да гласа за укинување на царините на ЕУ за американски индустриски производи.
Европската комисија побара објаснувања од Вашингтон. Врховниот суд на САД, претходно, го прогласи поголемиот дел од царините воведени од Трамп за незаконски. Трамп, сепак, најави нови вонредни царини. Тој во петокот зборуваше за десет проценти царини на стоки од целиот свет, а во саботата за 15 проценти.
Пресудата на Врховниот суд ја нарече „смешна, лошо напишана и исклучително антиамериканска“. Со тоа американскиот претседател предизвика неизвесност. Потребни се дополнителни информации од Вашингтон „за да можеме во целост да ја разбереме ситуацијата“, изјави портпарол на Европската комисија. Комисијата, како што се вели, е во контакт со американската влада.
И европските и американските компании имаат потреба од „сигурност и предвидливост“.