Новинарката Искра Мишиќ (позната и како Искра Џамбазова) ја сподели својата силна реакција по престојот во словенечката престолнина Љубљана, споредувајќи ја грижата за животните во Словенија со состојбата во нашата земја.
„Фотографијата е од мојот преубав престој во Љубљана. Текстот е за нешто друго“, започнува Мишиќ и продолжува:
„Додека престојував во земја, не толку далеку и далечна од нас, сепак своевремено бевме една држава, на улица не видов ниту едно напуштено, залутено, избегано куче или маче. Не затоа што некој физички ги ликвидирал, отрул или дислоцирал, туку затоа што државата има систем, меѓу другото и за нив, и тие се дел од општеството таму. Видов многу вдомени кученца кои гордо и среќно си шетаат со своите сопственици.“
По враќањето, вели дека првата вест што ја сретнала на телефонот било видео на кое се слуша болно и заглушувачко плачење на куче. Мишиќ признава дека не можела да го изгледа видеото и до денес не го погледнала.
„Да бев тука ќе го изгледав, знаете зошто? Затоа што сме се навикнале на се’ и сешто. Затоа што сме ја надминале границата на нормалното“, напишува таа.
Новинарката остро ја критикува општествената реакција на ваквите сцени, особено дел од коментарите под видеото.
„Секоја чест на здраворазумните љубители на животни, а со тоа и на природата и на самите себе. Но, за останатите: Како не разбирате дека ова не е нормално? Дека некој што може да убие живо суштество може да ве убие и вас? Дека на таков нечовек не му е место на улица? Како не ве заболе плачот, вресокот? Како не ви се слоши од сцената, за која јас немав сила? Сериозно запрашајте се дали нешто не е во ред со вас?“
Мишиќ завршува со порака дека текстот е предолг и дека малкумина ќе го прочитаат, но на „здраворазумните“ им порача: „Ве сакам“.
Објавата на Мишиќ доаѓа како реакција на неодамнешниот случај на сурово насилство врз куче, кој предизвика големо внимание и дебата на социјалните мрежи.
На фотографијата Мишиќ е десно