Натаму порталот наведува: Арбер Адеми смета дека „последните изјави на претседателот на Уставниот суд се непрофесионални и тенденциозни“, но и „спротивни на уставните принципи и Охридскиот договор“. Според Адеми, изјавата „ниту даваме, ниту земаме“, проследена со предупредувања за усогласување со Уставот без транспарентност, „директно е во спротивност со амандманот 5 на Уставот и претставува флагрантно кршење на правата на Албанците“.
Тој вели дека „недостатокот на транспарентност и затворените процеси предизвикуваат легитимна вознемиреност кај Албанците“, кои, според него, „со право гледаат опасност од едностран, мајоризирачки пристап и без професионална аргументација“.
Адеми ги критикуваше „ставовите против спроведувањето на бадинтеровиот принцип во донесувањето одлуки на Уставниот суд“. Според Адеми, „бадинтер не е политички изум, туку суштински уставен механизам за заштита на заедниците и зачувување на мултиетничкиот карактер на државата“.
„Исклучувањето на бадинтеровиот принцип од донесувањето одлуки за прашања, што директно влијаат врз колективните права, не го зајакнува владеењето на правото, туку го поткопува“, тврди Адеми, додавајќи дека „правдата не може да се одвои од уставната и општествената чувствителност“. – објави „Алмакос“.