На својот фејсбук-профил „Македоника литера“ натаму истакнува: „Филетизам или проклетство: аспекти на великобугарскиот шовинизам“ ја третира бугарската политика во изминатите 150 години од аспект на шовинизмот и филетизмот во Бугарија, што посебно се одразува врз Македонците во таа земја. Д-р Георгиев аргументирано и врз издржана фактографија и научна методологија ги разобличува бугарската политика и бугарскиот шовинизам, односно филетизмот во Бугарија и неговите погубни и неповратни последици врз Македонците во таа земја, кои во пиринскиот дел на Македонија во голем број со присилни миграции се доселени од Егејска Македонија, но и од Вардарска Македонија.
Авторот на проблемот му приоѓа од многу поширок аспект – ги третира и ги разобличува воопшто великобугарскиот шовинизам и бугарската политика на непочитување на националните права на другите етнички заедници, кои живеат во таа земја. Авторот ги третира и ги разобличува и бугарските национални митови и воведувањето на нивната романтична кауза за македонизмот како борба и негирање на македонството, односно на македонскиот идентитет.
Пишувајќи за големобугарскиот шовинизам, Георгиев во предговорот констатира дека тој е „жестока болест на Бугарија“. Тој го изнесува своето „убедување дека целата невистинитост, тенденциозност и неубедливост на бугарската лажна наука за `македонското прашање` станува јасна и видлива штом ќе биде споредена и со другите `национални идеали`, со стремежите кон другите земји и народи, со политиката кон малцинствата внатре во Бугарија – за да се види дека како политика и мисловност насекаде е една и иста, постојано пристрасна, свирепа во негирањето на вистината и во служба на политичката конјуктура – како некогаш, така и сега.“
Во заклучокот на книгата д-р Георгиев пишува: „Посебно внимание му посветивме на македонското прашање, колку што тоа се јавува како водечко во шовинистичката традиција на великобугаризмот и продолжува да биде актуелно и во денешните политички состојби во Бугарија. Со материјалите, што останале неуништени во Бугарија и кои ни појде од рака да ги откриеме, се обидовме да му го покажеме на надворешниот свет великобугаризмот од неговиот заден двор.“
„Филетизам или проклетство: аспекти на великобугарскиот шовинизам“ е исклучителен историографски труд, кој зафаќа различни историски периоди. Тој се потпира на огромна, разновидна и релевантна фактографија, користејќи близу илјада извори (литература, архивски фондови, весници и сл.) и наведувајќи близу три илјади цитати (фусноти) од релевантни извори. Оваа студија ја преведе Ванчо Меанџиски од бугарски на македонски јазик.
Константин Георгиев (1948) е поранешен универзитетски професор од Софија, Бугарија, кој, поради репресиите што ги доживувал од бугарските власти, предвреме ја завршил својата кариера на универзитетски професор. Во 1986 година е отпуштен од работа, како што формално стои во образложението на службите на Државната безбедност, затоа што „отворено изразувал негативен став спрема процесот на преродбата…, изјавувајќи дека политиката на БКП за националните прашања е спротивна од марксистичко-ленинистичката идеологија“. Оттогаш е во постојана репресија. Поништена му е докторската дисертација, одземено му е научното звање (подоцна вратено) и отстранет од работа, а подоцна му е укината пензијата. Автор е на неколку историографски и социолошки трудови. Живее во Софија. – пишува „Македоника литера“ на фејсбук.