Две години по стапувањето на функцијата, претседателката Гордана Сиљановска-Давкова во ексклузивно интервју за Македонското радио ја оцени својата работа како успешна во зацврстување на меѓународната видливост на земјата, интегритетот на институцијата и директната комуникација со граѓаните.
„Мислам дека многу работи се движат или се придвижија“, истакна претседателката, посочувајќи дека станала видлива во меѓународните односи, делумно и поради нејзиното долгогодишно искуство во европските институции уште од 1996 година.
Таа го спомена зацврстувањето на интегритетот на претседателската институција преку телата во нејзина надлежност, повторното отворање на Народната (отворена) канцеларија на 14 мај, соработката со Младинскиот совет и успешната конференција „Македонија 2025“.
Главен фокус – евроинтеграциите и бугарското вето
Најголем дел од интервјуто претседателката го посветува на македонските евроинтеграции и наметнатиот билатерален проблем со Бугарија.
Таа категорично ги отфрли обвинувањата дека „им држи лекции“ на европските претставници, нагласувајќи дека само укажува на двојните стандарди и на потребата од почитување на Копенхашките критериуми и основните вредности на ЕУ.
„Водена од националниот интерес, ама и од правото и правдата, јас само укажувам на неодржливоста на односот кон нас, односно на двојните стандарди“, рече Сиљановска-Давкова.
Таа се повика на Лисабонскиот договор, Повелбата за фундаменталните права и практиката на Европскиот суд за човекови права, потсетувајќи дека ЕУ треба да го почитува националниот и културниот идентитет на народите.
Претседателката посочи дека прашањето за македонскиот јазик, историја и култура е апсолвирано и дека барањата за промена на Уставот надвор од европското acquis (правна тековина) се несоодветни.
„Ние ги исполнуваме малцинските права над стандардите на многу земји членки на ЕУ“, додаде таа, спомнувајќи дека Франција и Грција не ги потпишале клучните конвенции за малцинства.
Преспанскиот договор и „pacta sunt servanda“
Сиљановска-Давкова повторно ја потврди својата позиција дека Преспанскиот договор бил спротивен на меѓународното и на македонското право, но истакна дека веќе е реалност.
„Нема логика ако е pacta sunt servanda, вие треба да бидете сервус… Од нас се бара да градиме со соседот единство на сличности, а секој има право на историја по свое“, рече претседателката.
Таа изрази задоволство што некои европски претставници, како новиот претседател на Европскиот совет Антонио Кошта, во Софија зборуваше за потреба од гаранции за Македонија.