Меѓународен настан насловен „Скопје – европска престолнина на културата 2028: обликување на иднината на Скопје“ ќе се одржи денеска, во хотелот „Александар палас“.
„ Скопје сигурно чекори напред како европски град и горд носител на титулата Европска престолнина на културата за 2028 година“ објави градоначалникот Орце Ѓорѓиевски на Фејсбук.
Скопје ќе биде во фокусот на Европа, домаќин на европски лидери и градоначалници, место каде се креираат нови партнерства и заеднички перспективи.
Со ова, започнуваме нов развоен циклус и модел кој се темели на долгорочни инвестиции, стратешка соработка и јасна визија за иднината.
Заедно со европските градови, институции и партнери, граѓаните и невладиниот сектор, го отвораме патот кон модерно, динамично и просперитетно Скопје.
Она што некогаш беше заглавено и доведено во прашање, денес добива конкретна форма и динамика на реализација“- напиша градоначалникот.
Ѓорѓиевски вчера имаше срдечна и пријателска средба со градоначалникот на Матера од Италија, Антонио Николетти
„Со особено задоволство бев домаќин на делегацијата од Матера, познатиот град на југот на Италија, предводена од градоначалникот Николетти.
Во отворена и конструктивна атмосфера, разговаравме за потенцијалите на нашите градови, разменивме искуства и ги поставивме темелите за идна соработка што ќе донесе нови можности за развој.
Оваа средба претставува увертира за утрешниот голем и значаен меѓународен настан, официјалниот почеток на „Скопје – Европска престолнина на културата 2028“.
Процес кој носи нова енергија, визија и трансформација – културна, дигитална и инфраструктурна, а сѐ во интерес на сите наши граѓани“.