Европската унија ѝ даде на Албанија зелено светло за отворање на последното поглавје од преговорите, кое ги вклучува земјоделството и кохезијата, објави премиерот Еди Рама.
Владата ќе ја подготви својата преговарачка позиција и ќе му ја презентира на данското претседателство со ЕУ.
„Албанија не запира – Денес, на 23 јули 2025 година, по континуираниот и динамичен напредок на Албанија на патот на пристапните преговори со Европската унија, Комитетот на постојани претставници на земјите-членки на Европската унија го овласти данското претседателство да ја покани Албанија да ја презентира својата преговарачка позиција за преговорите поврзани со поглавјата што го сочинуваат Поглавје 5 од Групата ‘Ресурси, земјоделство и кохезија’“, напиша Рама на социјалните мрежи.
Реагираше и претседателката на албанскиот парламент, Елиса Спиропали.
„Парламентот ќе продолжи максимално да ја поддржува презентацијата на преговарачката позиција и напорите, придонесите и инвестициите за одржлив рурален развој, модернизацијата на земјоделството и социјалната и територијалната кохезија на Албанија“, напиша Спиропали на социјалните мрежи.
Исто така, додава таа, Парламентот ќе ја интензивира парламентарната дипломатија „за да ја постигнеме нашата национална цел за Албанија 2030 во ЕУ“.
Албанија доби статус на кандидат во јуни 2014 година, почна преговори за пристапување во ЕУ во 2022 година, а очекува да го заврши преговарачкиот процес до 2027 година.