Студентски протест под наслов „Ќе се видиме на Видовдан“, организиран од студентите, ќе се одржи вечерва во 18 часот во Белград како кулминација на повеќе месечните протести, марѓеви и блокади.
Организаторите упатија две клучни барања до Владата на Србија, придружени со јасен рок: до 21 часот, вечерва.
Во отворено писмо објавено рано утрово, студентите побараа:
Распишување вонредни избори: Владата да поднесе предлог до претседателот на Србија за распуштање на Народното собрание во согласност со член 109 од Уставот, со цел распишување на вонредни парламентарни избори.
Прекин на контрапротестот во Пионирски парк: Владата да повика Министерството за внатрешни работи да го прекине паралелниот собир, кој според студентите е организиран од провладини групи и регистриран со цел да го ослабне легитимитетот на студентскиот протест.
Претходно српскиот претседател Александар Вучиќ порача дека Сбија не прифаќа ултиматуми ни од внатре ни од оние кои со месеци ја блокираат земјата.
„Ултиматумот не е прифатен, не мора да чекате до 21:00 часот. Србија никогаш не прифаќа ултиматуми“, рече Вучиќ.
„Не се плашиме од никого. Ги повикувам сите, татковски, да не ја уништуваат Србија. Добро е што дојде Видовдан за да можат сите да видат. Кои се насилниците и бандитите и кој отсекогаш бил за мир. На Видовдан ќе видиме дали некој се плаши или не. И ќе се види силата на српската држава, а тоа е да го зачува мирот и стабилноста“, рече Вучиќ. Потоа додаде:
„Од притисок и од Западот и од Истокот, од оние кои сакаат да бидеме нивни слуги. На сите ќе им биде јасно дека Србија е слободарска, слободна и независна земја. Народот не треба да се плаши, туку само оние кои мислат дека сакаат да постигнат нешто преку насилство. Никогаш нема да постигнете ништо преку насилство.“