Калин Ивановски продолжи со успешниот настап на тенискиот фјучерс во Загреб, кој се игра на земјени терени и за награден фонд од 30.000 американски долари, кадешто денеска го „нанижа“ и третиот носител и се пласира во полуфиналето заедно со колегата од Дејвис куп репрезентацијата на Македонија, Украинецот со македонски пасош Олег Приходко.
Ивановски, кој поради долгото отсуство поради повредата и операцијата неделава е 1147. на АТП-листата во сингл, славеше со 7-6 (4), 7-5 над Хавиер Баранко Косано (423.) од Шпанија и утре од 10 часот во мечот за финалето ќе се бори со Божо Барун (1973.) од Хрватска.
Првиот носител Приходко (410.), пак, го совлада Гркот Димитрис Сакеларидис (653.) со 6-4, 6-3 и утре исто така од 10 ч. во полуфиналето за противник ќе го има седмиот фаворит Хумојун Султанов (632.) од Узбекистан.