Американскиот Сенат вчера го поддржа нацрт-законот со кој се бара од претседателот Доналд Трамп да ја запре американската воена акција против Иран, што е најновата критика на републиканскиот претседател од се понезадоволниот Конгрес.
Сенатот гласаше со 50 спрема 48 за резолуцијата за воени овластувања, која ја усвои Претставничкиот дом на почетокот на овој месец, што ја одразува зголемената загриженост дури и кај некои републиканци на Трамп за непопуларниот конфликт што започна на 28 февруари, кога САД и Израел започнаа напад врз Иран.
Тоа е првпат двата дома на Конгресот да донесат резолуција со која се бара од претседателот да ги повлече американските вооружени сили од воена операција по усвојувањето на Законот за воени овластувања во 1973 година.
Иако веројатно ќе има само симболично значење, гласањето беше удар за Трамп, кој до неодамна уживаше речиси едногласна поддршка од републиканските членови на Конгресот. Гласањето, исто така, доаѓа кога се очекува администрацијата да побара од Конгресот десетици милијарди долари финансирање за војна.
Републиканците на Трамп имаат тесно мнозинство и во Сенатот и во Претставничкиот дом, но некои од нив во последниве месеци му пркосат на претседателот за низа прашања пред среднорочните избори во ноември, кои ќе одлучат дали партијата ќе ја задржи контролата врз Конгресот.
Резултатите од анкетата на Ројтерс/Ипсос, објавена вчера, покажаа дека секој четврти Американец верува дека војната против Иран е вредна за цената но повеќето се загрижени дали примирјето со Техеран ќе трае.
Во објава доцна синоќа, Трамп го критикуваше гласањето, нарекувајќи го „лошо темпирано“ и бесмислено, и ги обвини оние кои гласаа за резолуцијата дека му даваат поддршка на Иран и уште повеќе му го отежнуваат извршувањето на неговите должности.