Општина Битола го исполни ветувањето и во најкус рок ја замени спорната табла со натпис на новопоставениот споменик на војводата Александар Турунџев со нова на македонска кирилица.
„Општина Битола ја замени спомен-таблата на споменикот на херојот Александар Турунџев, која не беше напишана со македонска кирилица. Како што можете да забележите од сликата, сега сè е во ред, напишано на македонски јазик, со македонска кирилица. Вечна слава на херојот!
Општина Битола, честитки за експедитивноста!
Зборуваме на македонски јазик, пишуваме со македонска кирилица“, реагира на Фејсбук графичкиот дизајнер и типограф Ласко Џуровски, еден од најгласните поборници за стриктна употреба на официјалното писмо во Република Македонија.
Споменикот на великанот на македонската револуционерна борба беше свечено откриен на 20 август, на 120-годишнината од извршената смртна казна со бесење врз него на тогашниот Ат-пазар во Битола.