Вицепремиерот Изет Меџити, на покана на претседателот на Украина, Володимир Зеленски, престојува во Одеса, каде што се одржува самитот „Украина – Југоисточна Европа“.
Во објава на социјалните мрежи Меџити напиша дека во овие тешки времиња за европскиот мир и безбедност, тие цврсто стојат покрај Украина.
„Во овие тешки времиња за европскиот мир и безбедност, ние цврсто стоиме покрај Украина, која се бори за идеалите на слободата и демократијата.
Денес, на покана на претседателот на Украина, Володимир Зеленски, сум во Одеса, каде што се организира самитот „Украина – Југоисточна Европа“, настан од извонредно значење за нашиот регион и целиот континент.
Овој самит е клучен момент за повторно потврдување на нашата непоколеблива поддршка за суверенитетот и територијалниот интегритет на Украина, како и за продлабочување на нашето партнерство со земјите од Југоисточна Европа во предизвикувачко време за сите нас.
* Македонија стои на вистинската страна од историјата, односно во поддршка на Украина во нејзината титанска борба за слобода и демократија“, напиша Меџити.