Премиерот Христијан Мицкоски денеска изјави дека и покрај новите санкции кон Русија од страна на САД и на ЕУ, во Македонија ќе нема енергетска криза. Одговарајќи на прашање на новинарите дали по последните санкции на САД и ЕУ кон Русија, треба да стравуваме од нова енергетска криза и дали да имаме начин да се справиме ако се случи нешто, Мицкоски кусо одговори дека такво нешто нема да се случи во нашата земја.
- Не, нема да има, подготвени сме, ние ова одамна го антиципиравме и заедно работиме со дел од портфолијата во рамки на Владата за да не се случи тоа. Знаете имаше и ремонтни активности на гасоводот што ги потпишала претходната влада во заминување па не останавме без гас, односно топланите работеа. Сите овие работи ги антиципираме, но нормално е за работи кои се тековно работење на Владата. Не треба да ја оптоваруваме јавноста со такви ситници и нема да има такво нешто – изјави Мицкоски, прашан дали по последните санкции на САД и ЕУ кон Русија треба да стравуваме од нова енергетска криза.
Европската Унија пак донесе одлука за забрана за транзит на руски гас преку ЕУ до трети земји. Но, по ваквиот потег министерката за енергетика Божиновска излезе со уверување дека проблем нема да има и покрај тоа што најголем дел од количините на гас во земјава се токму од Русија.
Претходно и Српската нафтена индустрија НИС беше вклучена во санкциите. Претседателот Вучиќ синоќа соопшти дека наредните седум дена ќе бидат клучни за националниот енергетски сектор. Ќе се преговара со руските европските и американските партнери.