Со голот на десното крило Богдан Радивоевиќ од седмерец девет секунди до крајот, ракометарите на Еурофарм Пелистер го совладаа ПИК Сегед во Битола со 25:24 во натпреварот на неделата според ЕХФ во рамките на седмото коло од Лигата на шампионите.
По отворањето на мечот во преполната сала „Боро Чурлевски“ со водство од 5:0, при што гостите од Унгарија првиот гол го постигнаа дури во 11. минута, се чинеше дека на македонскиот првак не му бега втората победа во елитното натпреварување.
Пелистерци водеа и со 10:5, а на паузата заминаа со предност од 11:8, но само по шест минути од второто полувреме фаворитот израмни на 12:12, а малку подоцна и првпат поведе со 14:13 и ја продолжија неизвесноста до самиот крај.
Во почетокот од 58. минута ексвардарецот Глеб Калараш погоди за 24:23 за ПИК Сегед, но прво јунакот во домашниот состав Жарко Пешевски израмни на 100 секунди до крајот, па па гостите направија пробивање, за точка на драмата да стави Радивоевиќ од 7 метри по прекршокот врз Филип Кузмановски.
Пешевски беше најефикасен во победничкиот тим со 7 гола, од кои 5 во вториот дел, за што го доби признанието за играч на мечот, а капитенот Кузмановски запиша 4 погодока.
На половина од натпреварите во групата Б битолчани се претпоследни со 4 бода, два помалку од последното место што води во елиминациите, кое го делат ПИК Сегед, Пари Сен Жермен и Гудме.