Македонија скокна за 29 места на глобалниот индекс за сајбер-безбедност, со тоа држаните иституции стануваат побезбедни од надворешни напади. Подобрување има во сајбер-политиките, заштитата на личните податоци и борбата против компјутерскиот криминал. Земјава освои 84,17 од можни 100 поени, што претставува скок од 29 позиции во однос на претходното рангирање. Македонија е рангирана на 30 место меѓу 155 држави и територии, а целосни 100% има во шест од оценуваните области. Според Министерството за дигитална трансформација, резултатот ја вбројува Македонија меѓу државите со високо ниво на подготвеност за спречување и управување со сајбер-закани и инциденти.
- „Скокот од 29 позиции е меѓународна потврда дека реформите што ги спроведуваме создаваат конкретни и мерливи резултати. Во изминатиот период воспоставивме појасна институционална одговорност, современа законска рамка и посилни механизми за заштита на критичната инфраструктура и за одговор на сајбер-инциденти. Овој резултат не е крајна цел, туку обврска да продолжиме уште поинтензивно да ја градиме сајбер-отпорноста на државата“, изјави министерот за дигитална трансформација Стефан Андоновски.
Оттаму додаваат дека подобрувањето се должи на донесувањето на Законот за безбедност и Стратегијата за сајбер-безбедност 2025-2028.
Од Министерството за дигитална трансформација, оценија дека напредокот претставува меѓународна потврда за спроведените реформи во законската рамка и институционалната координација, што значи дека сега се работи на многу повисоко ниво.
Во фокус останува зајакнување на дигиталната отпорност, заштитата на јавните услуги, личните податоци и критичната инфраструктура, како и на подобрување на капацитетите за реакција при сајбер-инциденти.