Министерот за социјална политика, демографија и млади Ѓоко Велковски најави зголемување на пензиите од 3 до 3,5 проценти, почнувајќи од септемвриската што се исплаќа од 1 октомври.
„Се чека да заврши август и веќе следната недела ќе ги имаме параметрите и ќе излеземе со конкретни бројки, бидејќи треба да влезат во исплатата на септемвриската пензија што ќе се земе на 1 октомври“, изјави Велковски за ТВ Сител.
Тој го повтори ставот на премиерот Христијан Мицкоски за процентуално зголемување на пензиите, кои претходно со линеарното зголемување пораснаа за вкупно 7.000 денари.
„Постоеја иницијативи од поединци охрабрени од политички партии пред Уставниот суд да покренат тема за линеарното зголемување на пензиите. За да ги заштитиме пензионерите и пензиите, понатаму зголемувањето ќе биде согласно усогласувањата предвидени со закон“, објасни Велковски, потсетувајќи дека следното зголемување ќе се изврши во март наредната година.