Поранешниот претседател на Венецуела Николас Мадуро ги објави своите први фотографии од притворот во САД. Сликите се појавија речиси осум месеци откако американските сили го заробија во Каракас и го префрлија во Њујорк.
Фотографиите се снимени на 25 јуни во Метрополитен притворниот центар во Бруклин, каде што Мадуро заедно со сопругата Силија Флорес чека судење. На нив се гледа во затворска облека, насмеан и како покажува знак на победа.
„Сакам да знаете дека стоиме цврсто, нашите срца се полни со вашата љубов“, напиша Мадуро на социјалните мрежи.
Тој ги опиша сликите како „мал подарок на љубов и надеж“ наменет за неговите внуци, деца и поддржувачи.
„Ќе останеме силни, спокојни и самоуверени: Бог е со нас. Бог ќе се грижи. Венецуела ќе се прероди“, додаде тој.
Судењето е закажано за 1 јуни 2027 година пред федералниот судија Алвин Хелерстин. Мадуро и Флорес се во притвор без кауција уште од 3 јануари, кога беа заробени за време на воена операција во Каракас.
Обвиненијата против нив вклучуваат заговор за наркотероризам, заговор за увоз на кокаин во САД и дела поврзани со оружје. Обвинителите тврдат дека соработувале со нарко-картели за шверц на големи количини кокаин. И двајцата се изјаснија за невини.
На првото појавување пред судот во јануари Мадуро ги отфрли сите обвиненија.
„Јас сум пристоен човек. Јас сум се уште претседател на мојата земја“, изјави тогаш.
Неговите адвокати инсистираат дека како шеф на држава ужива имунитет и дека кривичното гонење е невозможно. Судот треба да го разгледа ова прашање пред да започне главното судење.
Мадуро (63) и Флорес (69) остануваат во притвор во Бруклин до нова одлука.
Pequeño regalo de amor y esperanza
Envío estas fotos como un pequeño regalo a todos mis nietos y nietas, a los niños y niñas, y a toda la gente noble que nos ama. pic.twitter.com/Z6u3130arn
— Nicolás Maduro (@NicolasMaduro) August 30, 2026