Македонија

Сали: Партиите се уште преговараат за Изборниот законик

Разговорите продолжуваат, но без детали за нови средби

Измените на Изборниот законик продолжуваат да бидат предмет на преговори, изјави денеска заменик-претседателот на Владата и министер за европски прашања Беким Сали. Тој не прецизираше дали прекинатите разговори меѓу партиите од власта и опозицијата повторно се обновени преку нови средби. Според него, по смената во Министерството за правда се прават напори за усвојување на законот.

– Вие знаете дека тој закон беше едногласно прифатен од повеќе политички фактори, да кажам политички партии кои се дел од Собранието, меѓутоа во последен момент се повлекоа две, не ги поддржаа тие измени. По промената во Министерството за правда веќе има напори за усвојување на тој закон, меѓутоа тоа е во фаза на преговори сè уште – изјави Сали додека одговараше на новинарски прашања поврзани со европската интеграција и реформите.

На прашањето дали се работи и на Кривичниот законик, чиј краен рок е декември годинава и кој се бара во сите извештаи на Европската Унија, вицепремиерот одговори потврдно. Тој истакна дека новиот министер за правда е посветен и на оваа тема.

– Новиот министер е посветен и на Кривичниот законик, така што сметам дека тоа се закони кои што бараат поширок консензус и поддршка од повеќе нивоа. Министерот работи и се надевам дека ќе успее да се реализира крајната цел – подвлече Сали.

Претседателот на Собранието Африм Гаши вчера посочи дека на координацијата со координаторите на пратеничките групи, претставникот на Левица го отворил прашањето за Изборниот законик поради ставовите поврзани со можни предвремени избори. Гаши оцени дека е добро да се разговара и нагласи оти доколку постои подготвеност, работната група и координаторите можат да ги продолжат разговорите.

– Не знам дали наскоро ќе има средба меѓу пратеничките групи околу Изборниот законик. Ако има подготвеност, тие ќе најдат начин да комуницираат. Добро е да се седне и да се разговара без оглед на тоа кога ќе има парламентарни избори. Координаторите треба да се договорат дали може да продолжат со напорите и дали може да се донесе Изборниот законик – нагласи Африм Гаши.

Премиерот Христијан Мицкоски вчера од ГП „Табановце“ изјави дека прво очекува заеднички став од опозицијата.

– Очекувам заеднички став на здружената опозиција СДСМ, Левица и ДУИ. Кога ќе имаат заеднички став, ние сме подготвени да разговараме и да најдеме заедничко решение – рече Мицкоски.

Од партиите вчера, пак, не можеше да се добие потврда дали разговорите околу Изборниот законик повторно се обновени.

Најнови вести од: Македонија

Аларм: Секое 10-то дете во Македонија изложено на сексуална злоупотреба на интернет

Секое десетто дете во Македонија на возраст од 12 до 17 години коешто користело интернет било изложено на сексуална експлоатација и злоупотреба. Станува збор за околу 12.000 деца, бројка што ја потврдува и последното истражување на УНИЦЕФ.

(Видео): Проблемот со кравите во Крива Паланка стигна до Обвинителството – Општината поднесе кривични пријави

Крива Паланка, заедно со жителите од засегнатите села, поднесоа неколку кривични пријави до Обвинителството поради институционално непостапување по извршни решенија за одземање на добитокот што слободно шета во градот и пошироко.

УКИМ не платил сметки за струја, ако не се плати долгот – факултетите ќе останат во мрак

Дел од државните факултети и Ректоратот од утринава се во мрак поради неплатени сметки за електрична енергија. Ова за Телма го потврдија и од ЕВН. Без струја останаа Машинскиот, Електротехничкиот, Природно – математичкиот, земјоделскиот факултет, но и зградата на Ректоратот.

Велковски: Во владина постапка се измените на Законот за детска заштита, од 2027 поголема поддршка за децата со посебни потреби

Измените на Законот за детска заштита веќе се во владина процедура, каде се предвидува зголемување на постоечките државни износи за поддршка, со посебен фокус на децата со посебни потреби, изјави министерот за труд и социјална политика и млади, Ѓоко Велковски одговарајќи на пратенички прашања во Собранието, нагласувајќи дека се очекува овие измени брзо да ја поминат собраниската процедура и од 1 јануари 2027 година децата од оваа категорија да добијат зголемени средства.

Николоски: Од 1 јануари 2027 државата ќе биде единствен организатор на интернет-игрите на среќа и ВЛТ терминалите

Владата останува на ставот за ограничување на игрите на среќа и веќе презеде конкретни законски мерки со кои се намалуваат можностите за нивно организирање, истакна заменик претседателот на Владата и министер за транспорт, Александар Николоски, одговарајќи на пратеничко прашање на Јована Мојсоска од Левица поврзано со работењето на Државна лотарија, односно дали Владата ќе иницира разрешување на директорот на Државна лотарија, Александар Климовски, како и дали ќе биде затворена платформата за онлајн коцкање „Мегавин“.

To top